ಅಂಗಳದ ಗಿಡದಲ್ಲಿ ಹೂಕುಟುಕ

ಮತ್ಯಾರ ನಿರೀಕ್ಷೆಯೋ ನಿನಗೆ...

ಸಣ್ಣಗಾತ್ರದ ಉಜ್ವಲವರ್ಣದ ಅತಿಥಿಗಳು ಈಚೆಗೇನಾದರೂ ನಿಮ್ಮ ಮನೆಯಂಗಳಕ್ಕೆ ಬಂದಿದ್ದರಾ? ನೀವು ಕಚೇರಿಗೆ ಹೋಗಿದ್ದಾಗಲೋ, ಅಥವಾ ಕೆಲಸದಲ್ಲಿ ಮಗ್ನರಾಗಿದ್ದಾಗಲೋ ಆಮಂತ್ರಣ ಇಲ್ಲದೆಯೇ ಬಂದು ಹೋಗಿರುತ್ತಾರೆ ಬಿಡಿ. ನಿಮ್ಮ ಗಮನಕ್ಕದು ಬಂದಿರಲಿಕ್ಕಿಲ್ಲ. ಬರುವುದಷ್ಟೇ ಅಲ್ಲ. ನಿಮ್ಮ ಮನೆಯಲ್ಲಿ ಹೂಗಿಡಗಳಿದ್ದರೆ ಖಂಡಿತ ಚಹಾ... ಕ್ಷಮಿಸಿ ಮಧುಪಾನವನ್ನು ಮಾಡಿ ಹೋಗಿರುತ್ತಾರೆ. ಈ ಬಾರಿ ಈ ಪುಟಾಣಿ ಅತಿಥಿಗಳು ರೆಕ್ಕೆ ಬಡಿಯುತ್ತ ನಿಮ್ಮ ಅಂಗಳಕ್ಕೆ ಅಡಿಯಿಟ್ಟಾಗ ಮರೆಯದೆ ಗಮನಿಸಿ, ಆತಿಥ್ಯ ನೀಡಿ.

ಹೂವಿನ ಸಿಹಿ ಹೀರುತ್ತ ಮೈಮರೆತ ಹಕ್ಕಿ.

ನೆಕ್ಟಾರಿನಿಯಿಡೀ ಕುಟುಂಬಕ್ಕೆ ಸೇರಿರುವ ಈ ಹಳದಿ ಹೂ ಗುಬ್ಬಿ(ಪರ್ಪಲ್ ರಂಪ್ಡ್ ಸನ್‌ಬರ್ಡ್) ಗಾತ್ರದಲ್ಲಿ ಗುಬ್ಬಚ್ಚಿಗಿಂತ ಸಣ್ಣವು. ಹೆಚ್ಚು ಕಡಿಮೆ ಹಮ್ಮಿಂಗ್ ಪಕ್ಷಿಯಂತೆ. ಇದರ ವೈಜ್ಞಾನಿಕ ಹೆಸರು "ನೆಕ್ಟರೀನಿಯಾ ಜೀಲಾನಿಕ".

ಈ "ಮರೆ"ಯಲ್ಲಿ ಕೂತೇ ಮುದ್ದು ಹಕ್ಕಿಗಳ ಚಿತ್ರ ತೆಗೆದದ್ದು.

ಸಾಮಾನ್ಯವಾಗಿ ವನ್ಯಜೀವಿ ಛಾಯಾಗ್ರಾಹಕರು ಹಕ್ಕಿಗಳ ಚಿತ್ರ ತೆಗೆಯಲು ಆಯ್ದುಕೊಳ್ಳುವುದು ಅದರ ಗೂಡನ್ನು. ಏಕೆಂದರೆ ಮರಿಗಳ ಪಾಲನೆಗಾಗಿ ಪದೇ ಪದೇ ಹಕ್ಕಿ ಗೂಡಿಗೆ ಬರುತ್ತದೆಂದು. ಇದಕ್ಕೆ ವ್ಯತಿರಿಕ್ತವಾಗಿ ಈ ಹೂ ಗುಬ್ಬಿಗಳು ನಮ್ಮ ಮನೆಯ ದಾಸವಾಳದ ಗಿಡಕ್ಕೆ ಪದೇ ಪದೇ ಲಗ್ಗೆಯಿಟ್ಟು ಮಧು ಹೀರುತ್ತಿದ್ದವು. ಫೋಟೋ ತೆಗೆದರೆ ಎಷ್ಟು ಚಂದ ಎಂದುಕೊಂಡು ಕ್ಯಾಮೆರಾ ಸಿದ್ಧಮಾಡಿ ಒಮ್ಮೆ ದಿನಪೂರ್ತಿ ಕಾದರೂ ಆ ದಿನ ಅವು ಸುಳಿಯಲೇ ಇಲ್ಲ! ಇನ್ನೊಮ್ಮೆ ನನ್ನ ಮನದ ಇಂಗಿತ ತಿಳಿದವಂತೆ ತಾವಾಗಿಯೇ ಬಂದು "ಟಿಟ್ಯೂಂ ಟಿಟ್ಯೂಂ ಟಿರ್ರ್..." ಎಂದು ಕರೆದವು.

ಹೆಣ್ಣು ಸೂರಕ್ಕಿ.

ಸರಿ ನಾನೂ ಫೋಟೋ ತೆಗೆಯಲು ಸಿದ್ಧನಾದೆ. ಗಂಡಿನ ತಲೆಯ ಮೇಲ್ಭಾಗದಲ್ಲಿ ಲೋಹ ಹೊಳಪಿನ ಹಸಿರು ಬಣ್ಣ. ರೆಕ್ಕೆ ಮತ್ತು ಬಾಲದ ಪುಕ್ಕಗಳು ಹೊಳೆಯುವ ನೇರಳೆ, ಕಂದುಬಣ್ಣ. ಎದೆ, ಹೊಟ್ಟೆ ಹಳದಿ ಬಣ್ಣ. ಹೆಣ್ಣು ಹಕ್ಕಿಗೆ ಹೊಳೆಯುವ ಬಣ್ಣಗಳಿಲ್ಲ. ಬೂದು ಬಿಳುಪು. ಗಲ್ಲ ಮತ್ತು ಹೊಟ್ಟೆಯ ಭಾಗ ಮಾತ್ರ ಹಳದಿ ಬಣ್ಣ. ಇವಕ್ಕೆ ಹೂವುಗಳಲ್ಲಿನ ಮಧು ಹೀರಲು ಅನುಕೂಲವಾಗುವಂತೆ ನೀಳ ಹಾಗೂ ಅತಿ ತೆಳುವಾದ ಕೊಕ್ಕು ಮತ್ತು ಸಹಾಯಕವಾಗಿ ನಾಳಾಕಾರದ ಚೋಷಕ ನಾಲಗೆ ಇರುತ್ತದೆ.

ಗಂಡು ಸೂರಕ್ಕಿ.

ಸಾಮಾನ್ಯವಾಗಿ ಇವು ಜೋಡಿಯಾಗಿಯೇ ಬರುತ್ತವೆ. ಒಂದು ಕ್ಷಣ ಒಂದು ಕಡೆ ನಿಲ್ಲದೆ ಅವಿಶ್ರಾಂತವಾಗಿ ಹಾರಾಡುತ್ತಿರುತ್ತವೆ.
ಮರೆಯೊಳಗೆ ಅವಿತು ತೂಕಡಿಸುವಾಗ ಇವು ಬಂದದ್ದು ತಿಳಿಯುತ್ತಿದ್ದುದೇ ಇವುಗಳ ಚಿಕ್ - ಚಿಕ್ ಅಥವಾ "ಟಿಟ್ಯೂಂ ಟಿಟ್ಯೂಂ ಟಿರ್ರ್..." ಎನ್ನುವ ವಿಶಿಷ್ಟ ಇಂಚರದಿಂದ. ತಕ್ಷಣವೇ ತಡಬಡಾಯಿಸಿ ಕ್ಯಾಮೆರಾ ಅಣಿಗೊಳಿಸುತ್ತಿದ್ದೆ. ಒಂದು ಕಡೆ ಕೂತು ಫೋಟೋಗಾಗಿ ಒಂದು ಭಂಗಿಯನ್ನು ಕೊಡುವುದು ಇವುಗಳ ಜಾಯಮಾನಕ್ಕೇ ಬಂದಂತಿಲ್ಲ! ಒಂದು ರೆಂಬೆಯಿಂದ ಮತ್ತೊಂದಕ್ಕೆ ಒಂದು ಹೂವಿಂದ ಮತ್ತೊಂದು ಹೂವಿಗೆ ನಿರಂತರವಾಗಿ ಸಿಳ್ಳು ಹಾಕುತ್ತಾ ಹಾರುತ್ತಲೇ ಇದ್ದವು.

ವಿವಿಧ ಭಂಗಿಗಳಲ್ಲಿ ಮಧುಪಾನ ಮಾಡುವ ಸೂರಕ್ಕಿ.

ಹಾಂ! ಈ ಹಕ್ಕಿಗೆ ಸೂರಕ್ಕಿಯೆಂತಲೂ ಹೆಸರಿದೆ( ಸನ್ ಬರ್ಡ್ ಎಂಬುದನ್ನು ಕನ್ನಡೀಕರಿಸಿ). ಆದರೆ ಸನ್‌ಬರ್ಡ್ ಎಂಬ ಹೆಸರು ಹೇಗೆ ಬಂತು? ನಾನು ಹುಡುಕಿದ ಯಾವ ಪುಸ್ತಕದಲ್ಲೂ ಇದರ ಬಗ್ಗೆ ಮಾಹಿತಿ ದೊರಕಲಿಲ್ಲ. ಸೂರ್ಯನಿಗೂ ಈ ಹಕ್ಕಿಗೂ ಇರುವ ಸಂಬಂಧವೇ ತಿಳಿಯಲಿಲ್ಲ.
ಅತಿ ಹಗುರ ಹಕ್ಕಿಗಳಾದ್ದರಿಂದ ಹೂವಿನ ತೊಟ್ಟು ದಳಗಳ ಮೇಲೆಲ್ಲಾ ರೆಕ್ಕೆ ಬಡಿಯುತ್ತಾ ತೆಲೆಕೆಳಗಾಗಿ ಜೋತಾಡುತ್ತಾ ಮಧು ಕುಡಿಯುವುದನ್ನು ನೋಡುವುದೇ ಕಣ್ಣಿಗೊಂದು ಹಬ್ಬ.
ಭಾರತದಾದ್ಯಂತ ಕಂಡುಬರುವ ಈ ಹೂಗುಬ್ಬಿಗಳು ಪರಾಗಸ್ಪರ್ಶಕ್ಕೆ ಸಹಾಯ ಮಾಡುತ್ತವೆ. ಜೋಳಿಗೆಯಾಕಾರದ ಗೂಡುಕಟ್ಟಿ ಎರಡರಿಂದ ಮೂರು ಮೊಟ್ಟೆಗಳನ್ನಿಡುತ್ತವೆ.
ಮನಮೋಹಕವಾದ ಈ ಹಕ್ಕಿಗಳ ಸೌಂದರ್ಯವನ್ನು ನೋಡಿ ಆನಂದಿಸುವುದು ಜೀವನದ ಸಾರ್ಥಕ ಕ್ಷಣಗಳೇ ಅಲ್ಲವೇ?